Ouvèti

Isit la, anyen pa rive. Anyen p ap ranje, anyen p ap kraze. Okenn entèpretasyon p ap vini. Okenn konklizyon. Sa a se pwent lage yon fil mo ki te son yon lè. Son ki yon jou t ap fè eko isit e la nan linivè a, nan yon kwen espas, oswa petèt sèlman nan yon kwen imajinasyon imen an. Kounye a, pandan liy sa yo ap pase devan je ou, enèji son sa yo gen lontan depi l fin disparèt, e se sèlman tras fantom yo ki rete sou paj la. Yo tout tonbe an silans. Tout son yo, e petèt tout monn sa a tou, ansanm ak tout moun li yo. Gendwa menm lespri ki yon lè te trase son sa yo sou papye a gen lontan deja depi l pa respire ankò. Menm jan moman sa a pase pandan ou t ap li fraz sa a, tout moman liv sa a gen tan pase. Moman ak imaj ki t ap pèdi nan gwo bri cho evenman monn nan, si yo pa t ekri yo isit la. Yo te ekri yo pou yo tounen yon pon ant monn pa m nan ak monn pa ou a. Yon pon ki soti nan monn pa m, nan moman m ap ekri fraz sa yo, rive nan monn pa ou, nan moman ou chita pou li yo. Bò isit la, mwen demele fil mo yo, epi bò lòt la, ou menm w ap ranmase yo. Tankou lè nou te timoun, lè Maman te konn demele fil len rad ansyen yo, epi nou te konn pran fil la pou nou mache nan tout kay la pou len an pa fè pil. Petèt jenerasyon pa ou a te rive kèk ane twò ta pou monn fil len sa a, men imajine: yon fwa, yon kote nan monn nan, se konsa timoun te konn jwe. Kounye a mwen demele fil mo yo, epi ou menm, pran yo pote yo ale nan monn pa ou, pou yo pa fè pil isit la, nan monn pa m nan.